ஊர் ஸ்பெஷல் - மதுரை மரிக்கொழுந்து

இந்த பகுதியில் ஒவ்வொரு ஊருக்கும் சிறப்பு என்று அழைக்கப்படும் ஒன்றை தேடிய பயணமும் அதை பற்றிய செய்தியுமே ஆகும், இதை தேடி போகும்போது பல பல ஆச்சர்யங்களை தருகிறது எனலாம். எனது முந்தைய பகுதிகளை படிக்க இங்கே சொடுக்கவும்....

ஆரம்பம் - நம்மூர் ஸ்பெஷல்
திண்டுக்கல் - பூட்டு
மணப்பாறை - முறுக்கு

அந்த வரிசையில் இன்று மதுரை மரிக்கொழுந்து !! இன்று வரை மதுரை பக்கம்
போகும்போது எல்லாம் இந்த  மல்லிகைப்பூ நினைவில் வரும், ஆனால் பாடல்களில், பேச்சுகளில் எல்லாம் மதுரை என்றாலே மரிக்கொழுந்து என்று வரும். இந்த முறை மதுரை சென்றிருந்தபோது ஒரு பூக்காரரிடம் விசாரித்தபோது அவர் ஒரு ஆள் நம்பர் கொடுத்து பேச சொன்னார். இப்படியாக ஆரம்பித்த தேடல் பல ஆச்சர்யங்களை கொடுத்தது என்றால் அது மிகையாகது !



முன்பெல்லாம் மரிக்கொழுந்து மாலை என்றே கிடைக்கும், பக்கத்தில் போனாலே மணம் ஆளை தூக்கும், இன்று பூக்களின் இடையில்தான் இந்த மரிக்கொழுந்து மாலை வருகிறது. மலர்கள் கூட இரண்டு நாட்களுக்குள் தமது நறுமணத்தினை  இழந்து விட கூடும். ஆனால் இந்த நறுமண இலைகளான மரிக்கொழுந்து இலைகள் கருகி போனாலும் மாதக்கணக்கில் நறுமணம் வீசி கொண்டே இருக்கும். அதனால் தான் இன்றும் மரிக்கொழுந்து மாலைகள் பிரபலம். இதிலேயும் "மதுரை மரிக்கொழுந்து" வாசனைக்கு பெயர் போனது.  அந்த மரிக்கொழுந்து ஒரு மரத்தில் வளரும் என்று நினைத்து போனால்......அட ஏமாற்றம்தான் எனக்கு !

அந்த ஆள் எங்களை CBI போல விசாரித்துவிட்டு கடைசியில் அது மதுரையை சுற்றி இருக்கும் ஊரில் இருந்து வருகிறது என்றும், அவர் திண்டுக்கல்லில் இருந்து வாங்குகிறார் என்றும் தெரிந்தது. அவரிடம் இருந்து இன்னொரு நம்பர் வாங்கி என்று கடைசியில் அடுத்த நாள் நாங்கள் மரிக்கொழுந்து தோட்டத்தில் இருந்தோம். இந்த மரிக்கொழுந்துகள்  நட்ட இரண்டரை மாதத்திலிருந்து அறுடைக்கு தயாராகிறது. அதன் பிறகு 30 முதல் 40 நாட்கள் இடைவெளியில் அறுவடையைத் தொடர்ந்து செய்யலாம். செடியை அடிமட்டத்தில் இருந்து வெட்டி அறுவடை செய்ய செய்யலாம் அல்லது மேலே மட்டும் கிள்ளலாம்.

ஒரு மரிக்கொழுந்து செடி வைத்து மூன்று மாதத்தில் நன்கு வளர்ந்து அறுவடைக்கு தயாராகும், பின்னர் ஒவ்வொரு மாதமும் நீங்கள் அதை பறிக்கலாம். இது போல நான்கு வருடம் வரை நீங்கள் செய்யலாம். நன்கு வடிகால் உள்ள மண் நீர் வசதி உள்ள நீர்நிலைகளில், குளிரான நன்கு வளரக்கூடியது. உயர்த்தப்பட்ட பாத்திகளில் விதைக்கவேண்டும். வளர்ந்த நாற்றுக்களை ஒரு மாததம் கழித்து 15 x 7.5 செ.மீ இடைவெளியில் பாத்திகளில் நடவேண்டும்.

கீழே இருக்கும் படத்தை பார்த்தல் தெரியும் இதை அறுவடை செய்யும் முறை. நான் அங்கே போயிருந்தபோது இதை அறுவடை செய்யும் நபரை பார்த்து இவர் மனிதனா அல்லது மெசினா என்று வியந்து போனேன். எங்களிடம் பேச்சு கொடுத்துக்கொண்டே அவர் விறு விறுவென்று ஒரு சிறு கட்டுக்களாக செய்து கொண்டிருந்தார். ஒரு கட்டில் சுமார் 15 மரிக்கொழுந்து செடியின் தண்டுகள் இருக்கின்றன, இதை கிலோ இவ்வளவு என்று சீசனுக்கு தகுந்தாற்போல விலைக்கு விற்கிறார்கள்.

இதை வாங்கும் உள்ளூர் ஆள், இதை மதுரை இடை தரகரிடம் விற்கிறார்கள். 

அவர், இதை பூக்கடைகளுக்கு விற்கிறார்கள் ! உங்களது கைகளில் அது வரும்போது 50 பைசா கட்டு ஒன்று மூன்றில் இருந்து ஐந்து ரூபாய் ஆகிறது !! இதை செடியில் இருக்கும்போது மோர்ந்து பார்த்தால் அந்த வாசணை தெரியவில்லை, ஆனால் அதை கிள்ளினால் குப்பென்று வாசம் உங்களை தூக்கும். கிள்ளும்போது அந்த செடியில் இருந்து வரும் ஒரு வகை எண்ணையே இதற்க்கு காரணம். மரிக்கொழுந்துகள் அழகு சாதனைகள், நறுமணபொருட்கள், தின்பண்டங்கள், புகையிலை, மற்றும் வாசனை திரவியங்கள் தயாரிக்க பயன்படுகின்றன. குளிர் காலத்தில் பயிர் செய்யப்படும் மரிக்கொழுந்து மற்றநேரங்களில் பயிர் செய்வதை விட

அதிக அளவில் வாசனை எண்ணெய் மகசூலை தருகிறது.

கிராமங்களில் எல்லாம் பெண் பிள்ளைகளுக்கு மரிக்கொழுந்து என்று பெயர் இருக்கும், இதன் மணம்தான் அந்த பெயரை வைக்க தூண்டியதோ என்னவோ ! இந்த பயணத்தில் மதுரையின் 

பெருமையான மரிக்கொளுந்துவை பார்த்து, அதை பயிர் செய்யும் முறையை பார்க்கும்போது, அடுத்த முறை இதன் வாசம் மட்டும் யாபகம் வராது, இந்த இனிய அனுபவமும் நினைவில் வரும் !!