அறுசுவை - ஜேக்கப்'ஸ் கிச்சன், சென்னை

 எவ்வளவோ சமையல் ப்ரோக்ராம் டிவியில் வந்தாலும் நான் பார்ப்பதில்லை, முதல் காரணம் அதில் உயிர் எதுவும் இருப்பது போல் தெரியாது, இரண்டாவது காரணம் எப்போதும் ஸ்டுடியோவில் எடுப்பதால் அது ஒரே மாதிரி இருப்பது போல தெரிவது. ஆனால், ஒரே ஒரு சமையல் ப்ரோக்ராம் மட்டும் என்னை திரும்பி பார்க்க வைத்தது என்றால் அது சன் டிவியில் வரும் ஆஹா என்ன ருசி, அதை நடத்தும் ஜேக்கப்  என்பவர் சில நேரங்களில் செல்லும் இடங்களை பார்த்தால் ஆச்சர்யமாக இருக்கும். இந்த முறை சென்னை சென்று இருந்த பொது இந்த செப் ஜேக்கப் அவர்களின் உணவகம் ஒன்று உள்ளதாகவும், அதில் நாம் ஆச்சர்யப்படும் அளவுக்கு உணவுகள் இருக்கிறது என்றபோது அதை முயன்று பார்த்து விடுவது என்று நினைத்திருந்தேன். வாருங்கள் மறைந்த செப் ஜேக்கப் அவர்களின் உணவகத்திற்கு செல்வோம்......

நீங்கள் உணவகத்தின் உள்ளே நுழையும்போதே அவ்வளவு அமைதியாக இருப்பது கண்டு ஆச்சர்யபடுவீர்கள். பொதுவாக உணவகத்தில் உணவு உங்களை ஆச்சர்யபடுதவில்லை, அல்லது சுவையாக இல்லை என்றால் எல்லோரும் பேச ஆரம்பிப்பார்கள், அல்லது இரண்டாவது காரணம் அது ஒரு ஸ்டார் ஹோட்டல் ஆக இருந்தால் உண்ணும்போது பேசுவது என்பது அநாகரீகம் என கருதப்படும்.  ஆனால், இந்த உணவகத்தில் உணவின் சுவையிலும், அது வித்யாசமாக இருப்பதனால் அது எப்படி செய்யப்பட்டது என்று யோசிப்பதனாலேயும் எல்லோரும் மிகவும் அமைதியாக இருந்தனர் எனலாம்.

நாங்கள் மெனு கார்டு பார்த்தபோது எல்லாமே வித்யாசமாக இருந்தது போல இருந்தது. முதலில் நண்டு ரசமும், சிக்கன் கரண்டியும் ஆர்டர் செய்தோம். நன்கு வெந்த நண்டு மாமிசத்தை கொதிக்க வைத்த நீரில் இஞ்சி, பூண்டு என்று போட்டு மிளகு சேர்த்து கொண்டு வந்தபோது வாசனையே தூக்கியது. ஒரு வாய் எடுத்து வைத்தவுடன் என்னமாய் செய்து இருக்கிறார்கள் என்று தோன்றியது ! அடுத்து வந்த சிக்கன் கரண்டி என்பதில் நம்ம ஊரு கரண்டி ஆம்பலெட்தான் என்றாலும் அதில் சிக்கன் இருப்பதே தெரியாத அளவுக்கு நன்கு நறுக்கி போட்டு பூ போன்ற ஆம்பலேட் கொண்டு வந்தனர், சிறிது நேரத்தில் அது இருந்த இடம் தெரியவில்லை !

அடுத்து ஜவஹர் ஜலூர் பரோட்டாவும், மண்பானை சிக்கன் பிரியாணியும் ஆர்டர் செய்துவிட்டு அதற்க்கு கோழி வறுத்த குழம்பும் கேட்டோம். நன்கு சிறிதாக நறுக்கப்பட்ட மட்டன் பீஸில், வெங்காயம் போட்டு சிறிது தோசை கல்லில் பிரட்டி எடுத்து, அதை சேமியா போன்ற பரோட்டாவில் நடுவில் வைத்து சூடாக எடுத்து வந்த போது கண்ணுக்கும் குளிர்ச்சி, சாப்பிட்டபோது மனதுக்கும் இதம் ! அடுத்து வந்த மண்பானை சிக்கன் பிரியாணியில் வழக்கமான பிரியாணியின் சுவைதான் இருந்தது என்றாலும் அதை ஒரு மண்பானையில் கொடுத்த விதம் அருமை !

 

ஒவ்வொரு உணவும் வித்தியாசமாகவும்,  சமயம் சுவையாகவும், இது என்ன என்று குழந்தையின் ஆர்வத்துடன் சுவைபதிலும் இருக்கிறது. இது போன்ற உணவகங்கள் ஒரு சிலதான் இருக்கின்றன. இந்த உணவுகளை சாப்பிடும்போது இப்படி பார்த்து பார்த்து சமைத்த மனிதன் அங்கு இருக்கும் போட்டோவில் மாலையுடன் இருக்கிறார் என்னும்போது மனது என்னவோ செய்கிறது.......ஜேக்கப், நீங்கள் மறைந்தாலும் நீங்கள் அறிமுகபடுத்திய சுவைகள் மறக்காது !

பஞ்ச் லைன் :

சுவை - ஏகப்பட்ட வகைகள், எல்லாமே நல்ல சுவை மற்றும் வித்யாசம் ...... நிச்சயமாக நீங்கள் போக வேண்டிய இடம் இது !

அமைப்பு - நல்ல பெரிய உணவகம், பார்கிங் வசதி உண்டு !
 

பணம் - ஒரு ஆளுக்கு சுமார் 350 ரூபாய் வரை வருகிறது !

சர்வீஸ் - நல்ல சர்விஸ்,  பார்த்து பார்த்து செய்கிறார்கள்.

அட்ரஸ் :

மெனு கார்டு :

Labels : Arusuvai, Jakob's kitchen, sun tv, amazing food, Suresh, Kadalpayanangal, Different food, tasty